BHEKI NDLOVANA
UFIKILE Mbalula onguNobhala-jikelele we-ANC uthi imiphumela yakamuva yokhetho lokuchibiyela ezindaweni ezahlukene komasipala ezweni lonke ikhombisa ukuthi abantu basayethemba i-ANC.
Usho lokhu ngoLwesihlanu emini esithangamini sabezindaba, lapho ebekhuluma khona ngezinto ezehlukene ezenzekayo ezweni.
Uthi ezindaweni eziwu-18 lapho i-ANC ibingenele khona lolu khetho lokuchibiyela, inqobe kweziwu-14. Uthi nakuba behluliwe okhethweni lokuchibiyela obeluseMtubatuba KwaZulu-Natal, lapho kunqobe khona i-IFP, kodwa isibalo samavoti abasitholile sikhombisa ukwenza kangcono kwenhlangano yakhe.
UMbalula uthi okhethweni obelungomhla ka-29 kuNhlaba kulo nyaka, kule wadi yaseMtubatuba babethole amavoti awu-217, kodwa kulolu lokuchibiyela bathole angaphezu kuka-900.
Lokhu ukuhumusha ngokuthi kusho ukubuya kwamavoti ebisilahlekelwe yiwona i-ANC.
