IZINKUMBI zabantu baseDemocratic Republic of Congo (DRC), ezibhace eNingizimu Afrika sezinxuse i-European Union (EU), ukuthi inswinye iRwanda. Lezi zinkumbi zabaseCongo, zimashele emahhovisini e-EU, ePretoria, zahambisa uhla lwazo lwezikhalo njengoba phakathi kokunye, bethi izihonga zamavukelambuso eM23, zixhaswa nguhulumeni waseRwanda.
Lezi zihonga, zeM23, yizona ebesezigasela eGoma, empumalanga neDRC, lapho kugcine sekudutshulwa namasosha aseNingizimu Afrika, abeyosiza eDRC ngokohlelo lokuletha ukuthula kuleliya lizwe. Angu-14 amasosha eSouth African National Defence Force (SANDF), abulewe eDRC, selokhu beqalile ukubambana ngezihluthu.
AbaseCongo abazinze kuleli bamashele ePretoria, bethi bacela iSANDF, etshalwe eDRC ingakhishwa ngoba ithemba labantu bakhona lisemasosheni.
UNgqongqoshe wezokuVikela eNingizimu Afrika, uNkk Angie Motshekga, uthwale kanzima echazela ikomidi lalo mnyango, eCape Town ngesimo sasempumalanga neDRC, njengoba amanye amalungu alo abethi amasosha akuleli awabuyiswe eDRC.
menzi.jele@ilanganews.co.za
