UMNYANGO weMfundo eyisiSekelo kuzwelonke usamile ekutheni awukaze wathola izikhalazo kubafundi bakamatikuletsheni noma kubazali babo ngokushicilelwa kwemiphumela yabo emaphephandabeni.
Umnyango uveza lokhu nje, iNkantolo eNkulu yasePitoli ilalele isicelo esiphuthumayo senhlangano ebhekelele ukugcinwa kwemininingwane yabantu i-Information Regulator (IR), efuna ukuba le nkantolo iphoqe umnyango ukungayishicileli imiphumela kamatikuletsheni ka-2024 emaphephandabeni mhla ka-14 kwephezulu.
Le nhlangano ikholwa wukuthi ukuyishicilela imiphumela kuwukwephula ilungelo lokugcinwa kwemininingwane yabantu iyimfihlo, elihlinzekwa wumthetho i-Protection of Personal Information Act (Popia).
I-IR ithi ifuna umnyango uhlinzeke imiphumela yabafundi usebenzisa ezinye izindlela ezingekho emehlweni abantu, okungaba wukuthi abafundi bayilande ezikoleni abebefunda kuzona (imiphumela).
Umnyango uthi akukho lungelo elephulwayo ngokushicilelwa kwemiphumela njengoba ngo-2022 inkantolo yanquma ukuthi kuqhutshekwe nokushicilelwa, kodwa kusetshenziswe inombolo yokuhlolwa yomfundi, ingadalulwa eminye imininingwane.
Icala belisaguqe okwesikhashana ePitoli namuhla ngoLwesibili.
