INHLANGANO iNkatha Freedom Party (IFP), iluleke amalungu ayo ukuba aqinisekise ukuthi iba yinhlangano enakekela zonke izakhamizi ezingaphansi kwemikhandlu eziyibusayo.
Lokhu kushiwo nguSihlalo we-IFP KwaZulu-Natal, ophinde abe nguNdunankulu wesifundazwe, uMnu Thami Ntuli. UNtuli ubekhuluma ngesikhathi leli qembu linengqungquthela yezinsuku ezimbili, eqale ngoMgqibelo yaphetha ngeSonto, eMpangeni, lapho ubuholi beqembu bebuyocebisana khona ngamaqhinga nezindlela zokukhankasela ukhetho.
Le ngqungquthela ibihanjelwe wubuholi obuphezulu be-IFP, okubalwa kubo uMengameli weqembu uMnu Velenkosini Hlabisa, ubuholi bamagatsha eqembu namalungu alo. UNtuli uthi izikhathi zepolitiki sezishintshile, ngakho neqembu kumele lithole izindlela ezintsha zokungena ebantwini.
“Esikhathini samanje sezishintshe kakhulu izinto kwipolitiki. Yingakho ukukhankasa kwe-IFP kumele kuhambisane nezinguquko. Ezinye zazo zinhle, ezinye zimbi. Sesibhekene nesikhathi lapho kunamaqembu epolitiki amaningi, nezakhamizi zakuleli zinezimfuno nezikhalo eziningi kulabo abaphathiswe amahhovisi omphakathi.
“Kumele sizilalele, siziqonde izikhalo zamalungu omphakathi, silalele bese siziphendula ngendlela efanele. Kumele siqinisekise ukuthi i-IFP iyiqembu elisiza zonke izakhamizi ezidinga usizo, sikhombise ukuthi okwethu ukuhola okokusiza umphakathi, akukhona okukusiza amalungu eqembu kuphela,” kusho uNtuli.
Eqhuba, ululeke amalungu eqembu ngokuthi isikhiye sokunqoba ukhetho wukulalela nokuhlonipha izidingo ezethulwa yimiphakathi yakuleli.
UHlabisa uthi ubuholi beqembu kumele buqinise imikhankaso yabo ikakhulukazi ezigabeni eziphansi.
“Ohulumeni baseKhaya yibo abasondelene kakhulu nempilo nenhlalakahle yansuku zonke yezakhamizi zakuleli. Indlela omasipala abasebenza ngayo, yiyo eqinisekisa ukuthi izakhamizi ziphila impilo esezingeni, nokuthi intuthuko ihamba kangakanani. Uma omasipala besebenza ngendlela intuthuko, wukuthuthuka komnotho nokutshalwa kwemali sizokubona ngamehlo. Yingakho ke kumele siqinise ubudlelwano bethu obuhle esinabo nezakhamizi zakuleli,” kusho uHlabisa.
