“KUYE ngamagama enkehli. Besiwulindele umphumela omuhle ngokunqoba kweziMpofana. Namaphanta besiwatshela ukuthi kufanele agembule kanjani ngoba besazi ukuthi kuzonqoba iKaizer Chiefs”. Lawa ngamazwi ashiwo nguMnu Thokozani Mncwabe okhulumela umholi webandla lamaNazaretha, iNkosi uMduduzi ‘Nyazilwezulu’ Shembe emuva kokuba kunqobe Amakhosi kowamqamu obuphakathi kwawo ne-Orlando Pirates.
Ububhekwe ngabomvu umphumela walo mdlalo emuva kokuba abebandla lakwaShembe bebezishaya isifuba ngokuthi kuzonqoba iChiefs kulo mdlalo kulandela ukubonakala kwezikhulu zayo zizohlangana noNyazi ngenhloso yokulwisana nesomiso sokunganqobi izindebe kule kilabhu yakwaMotaung. Besekuphele iminyaka eyishumi leli kilabhu ingannqobi lutho.
Ngaphambi komdlalo wangoMgqibelo ILANGA Lempelasont eliyingane yaleli phephandba libike amahlandla amabili ngokubonakala kwezikhulu zeChiefs ziyocela isibusiso sokunqoba. Ngeledlule kuvelile ukuthi nayo i-Orlando Pirates ike yamvakashela lo mholi izocela yaphinde yabuya izomkhomba indebe yeMTN 8 eyayikade iyinqobile nyakenye ngenyanga kaMfumfu (October).
“Ngaphambi komdlalo wokwandulela owamanqamu owawuphakathi kwabo neMamelodi Sundowns indodana kaMotaung, uKaizer Junior Motaung yafika izohlangana nobaba uNyazi. Bafika ekuseni engekho ubaba. Nangempela baphumelela kulowo mdlalo bawunqoba. Bahlala usuku lonke belinde ubaba kwaze kwabe uyafika, bahlangana naye. Baphinde babuya bezocelela ukunqoba owamanqamu. Nangempela kwenzekile lokho bawunqobile,” kusho uMncwabe.
ILANGA lixhumane noMnu Vina Maphosa okhulumela iKaizer Chiefs. Uthe uma kukhona ukuphawula okufanele kwenzeke ngalolu daba kuzokwenziwa ngabaphathi bekilabhu. “Mina ngikhulumela ikilabhu nezindaba ezithinta abadlali nabalandeli bekilabhu. Uma kuwukuthi umthandazo woNyazi ubambe iqhaza kulo mphumela, lokho kuzoshiwo ngabaphathi bekilabhu. Thina akukho esingakusho ngalolu daba,” kuphetha uMaphosa.
