INKAMPANI ephehla ugesi kuleli i-Eskom, ithi inethemba elikhulu lokuthi ukuchishwa-kongiwa kukagesi okuqhubekayo kuzophela kusasa ngoMsombuluko.
Le nkampani ithi ilindele ukuba abuyele ekusebenzeni ngokwejwayelekile ama-unit aphazamisekile ngasekupheleni kwesonto. Izolo ngoMgqibelo i-Eskom imemezele ukuthi kubuya isigaba sesithathu (Stage 3) sokucishwa-kongiwa kukagesi.
Ezinye zezizathu ezibekiwe ngokucinywa kukagesi yizimvula ezinamandla ezihlasele ezengxenyeni ezehlukene ezweni.
Ekhuluma ne-eNCA namuhla ngeSonto ekuseni, uMnu Chris Yelland, ongungoti kwezamandla, uthe kuyadabukisa ukuthi i-Eskom ivike ngesimo sezulu, kube sengathi yinto ebingalindelekile.
“Sisesikhathini sezimvula. Yinto elindelekile ngalesi sikhathi ukuthi kube nemvula enkulu eMpulalanga. Ingqalasizinda kagesi kumele ikwazi ukumelana nezimo,” esho.
