ITHEMBA Njilo Foundation, ihlele umjaho owaziwa ngeSeven Days War Memorial Fun Run, ozoba seMgungundlovu ngeSonto. Umjaho uzosukela KwaMnyandu, uzungeza izindawo ezathinteka ngempi eyathatha izinsuku ezingu-7, eVulindlela nase Edendale ngo-1990. UMgungundlovu wawuvutha amalangabi ngo-1990, i-ANC eyayisanda kuvulwa umlomo, iholwa nguMnu Harry Gwala, yayitholene phezulu neNkatha, isaholwa nguMnu David Ntombela.
Kwafa abantu abaningi e-Edendale nakwaVulindlela, kwasha imizi abantu bashiya amakhaya. UMnu Themba Njilo, onguSoabhizinisi nowake waba yiMeya yaseMsunduzi, uthi ngalo mjaho, bahlose ukuthoba abantu abathinteka nabalahlekelwa izihlobo amanxeba.
“Ngingomunye wabokuqala ababuyela ekhaya KwaMnyandu ngo-1995, udlame seludambile. Ngo-1996 kuya ku 1997, sasiba nemikhuleko nemindeni nezihlobo zabantu abalahlekelwa imiphefumulo, ngeSeven Days War. Lo mjaho siba nawo minyaka yonke, ukukhumbula isehlakalo esifikisela usizi. Uzosuka KwaMnyandu, udlule ezindaweni ezinjengoNadi, KwaShange, KwaGezubuso, e-Edendale, KwaVulindlela, ubuye uzophelela KwaMnyandu,” kuchaza uMnu. Njilo.
Uthi lo mjaho, uvuleleke kuwo wonke umuntu, hhayi abaseMsunduzi naseMgungndlovu kuphela.
menzi.jele@ilanganews.co.za.
