UGEZA igama labaculi bakamaskandi abasolwa ngokuzithathela izinqumo ngomngcwabo weNkosi YamaGcokama umasingcwabisane waMathole Funerals.
UMnu Vezokuhle Nala waMathole uthi asikho isinqumo esathathwa uKhuzani Mpungose noNtencane Zondi ngaphandle kokuvumelana nomndeni weNkosi Yamagcokama ngokuthi imali engango R230 000 eyayinikelwe abaculi ukuba inikezwe Amathole.
Uveze ukuthi ukusiza kwakhe ngokuhlela imingcwabo yomibili eMsinga, kungenxa yokuthi wayecelwe abaculi.
“Abaculi sahamba nabo saya emndenini ngesikhathi kuzwakala izindaba zokushona kwamalungu emndeni, bayitshela imindeni izifiso zabo zokuthi bazobamba iqhaza ekungcwabeni, baqoka Amathole kwabe sekuvunyelanwa,” kusho uMnu Nala.
Uthe izindleko zomngcwabo wegidangoma leNkosi YamaGcokama uSipho “Gupta” Mchunu, ubeyizindleko ezingaphezulu kuka-R230 000 owawukhishwe abaculi.
“Izindleko zomngcwabo kaGupta zingaphezulu kwale mali eyakhishwa abaculi, ngingakawuthinti oweNkosi YamaGcokama umngcwabo. Laba abakhuluma kakhulu ezinkundleni zokuxhumana besola ukuthi ngathola imali eningi okwakumele inikezwe umndeni wakwaDlamini, bakhulunyiswa ukungazi,” kusho uMnu Nala.
