UNGQONGQOSHE wezemiDlalo, ubuCiko namaSiko uMnu Gayton McKenzie uthe ngeke ayixolisele into angayazi futhi ngeke esule esikhundleni sakhe.
UMcKenzie, ongumholi weqembu iPatriotic Alliance, uzalelwe yinja endlini ngeledlule ngemuva kokusabalala kwama-post akudala kwi-X (Twitter), ‘ebiza abamnyama ngamakhafula’.
Uthi ukugxekwa kwakhe nokufakelwa kukaMengameli Cyril Ramaphosa ukuba amthathele izinyathelo kuyitulo lokudicilela phansi isithunzi seqembu lakhe njengoba kuyiwa okhethweni ngonyaka ozayo.
“Selokhu ngazalwa, angikaze ngibize umuntu ngekhafula. Onobufakazi makavele obala athi wena Gayton, wabiza usibanibani ngekhafula,” esho.
“Ukucwasa ngokobuhlanga kuba nesisulu. Ngubani isisulu lapha? Ngubani umuntu engambiza ngekhafula? Yinto yokuqala leyo okufanele kuvele ubufakazi bayo ngaphambi kokuba ngithathelwe izinyathelo.”
Uthi nakuba kumcasula ukuhlanjalazwa ngalezi zinsolo, kodwa uzoluthobela uphenyo uma lwenziwa, ukuziveza ukuthi umsulwa.
Ama-post kaMcKenzie akudala avele ngemuva kokuba evulele icala abe-Open Chats Podcast ebasola ngenkulumo ecwasa amaKhaladi.
Amaqembu okubalwa kuwona iDA, i-EFF ne-Action SA asefake ingcindezi kuRamaphosa nakwiHuman Rights Commission ukuba athathelwe izinyathelo uMcKenzie.
