KUBHEKWE ukuba uthele izithelo ezinhle umhlangano kaNgqongqoshe wezeMali KwaZulu-Natal uMnu Francious Rodgers neziphathimandla zikaMasipala wesiFunda uMkhanyakude obubanjelwe emahhovisi kahulumeni eMgungundlovu ngoLwesibili.Â
Ukubanjwa kwalo mhlangano kulandela ukuhoxiswa kwesinqumo sikahulumeni wesifundazwe sokufaka ngaphansi komlawuli lomkhandlu ngoba kunesikhalo sokungaphathwa kahle kwemali yabakhokhintela.Â
URodgers uhlangane neziphathimandla zalo mkhandlu ebeziholwa yiMeya yawo uMnu Sphile Mdaka. Phakathi kwezinye zezivumelwano ezenziwe kube ngesokusebenzisana phakathi kwalo mkhandlu nomnyango. Lo mnyango uzohlinzeka ngezeluleko ikakhulukazi uma kusentshenziswa imali kulo masipala.
Ungqongqoshe uthe unethemba lokuthi lezi zinhlaka zizobambisana kuzona zonke izinhlelo ezisunguliwe emuva kwalo mhlangano.Â
“Okwamanje sincoma ukusebenza ngokubambisana kwabaholi boMasipala waseMkhanyakude. Esinye sezinqumo esivumelene ngazo ngesokuba kubuyiswe ongoti bomnyango abesebehoxisiwe. Sinethemba lokuthi kuzothela izithelo ezinhle ukubambisana phakathi kwethu neziphathimandla zalo mkhandlu,” kusho uRodgers.Â
UMdaka uthe okunye okubathokozisayo wukuthi lo mkhandlu kawusekho ngaphansi kweso lomlawuli.
“Singakuqinisekisa ukuthi amahhovisi kamasipala asevuliwe. Kuyasentshenzwa njengokujwayelekile. Nakuba abevalekile amahhovisi omkhandlu, kodwa thina besiqhubeka nokusebenza. Ongoti bomnyango siyabemukela ngoba bazosiza, ikakhulukazi ezinhlelweni eziphathelene nokwabiwa kwamathenda nokusebenza kwemali. Ongoti bahoxiswa esikhathini lapho usubonakala umsebenzi wabo,” kusho uMdaka.Â
ILANGA lixhumene noMnu Senzelwe Mzila, okhulumela uMnyango wezokuBusa ngokuBambisana nezoMdabu KwaZulu-Natal, wenqaba ukuphawula. Uthe lolu wudaba lwekhabhinethi yesifundazwe.
Belukhala lungabanjwa ucingo lukaMnu Bongani Gina okhulumela uhulumeni waKwaZulu-Natal.
