KUBHUNTSHE inkonzo yokubusisa ithempeli ebihlelwe ngamaNazaretha aseKuphakameni, aholwa yiNkosi uVukile “iNcoyincoyi” Shembe, ngenxa yombango wendawo ophakathi kwalolu hlangothi nolwaseBuhleni, oluholwa yiNkosi uMduduzi “Nyazilwezulu” Shembe.
Le nkonzo obekumele ibe ngoMgqibelo, ethempelini eliseMafahlawana, eNewcastle, igcine ingenzekanga ngenxa yokuthi zombili izinhlangothi zithi ithempeli ngelazo. ILANGA libike kabanzi ngalolu daba oshicilelweni lwangoLwesine. Kulolo shicelelo kwavela ukuthi kwagasela amadoda azibiza ngaNazaretha angamalungu ebandla laseBuhleni, aphazamisa abaseKuphakameni ababelungiselela le nko nzo egcine ibhuntshile.
Lawo madoda abonakala kwi-video ehlakaza amatshe amhlophe ethempeli, ethi indawo ngeyoNyazi. Inkosi yesizwe, iNkosi uMadoda Nkosi, yaphawula kuleli phephandaba, yathi iyalwazi udaba, luzohlala emkhandlwini wayo ngalo uLwesine. ILANGA lithole ukuthi udaba lwahlala emkhandlwini wenkosi, izinhlangothi zombili zathelelana amanzi, kwavunyelwana ngokuthi abaseKuphakameni bangaqhubeka namalungiselelo enkonzo.
Kuvela ukuthi izinto kazihambanga njengokwesivumelwano, njengoba abazibiza ngamadoda aseBuhleni bephinde bagasela, baphazamisa izinhlelo zabaseKuphakameni, inkonzo yagcina ithuthelwe ehholo lomphakathi lesizwe esiwumakhelwane. UMshumayeli uThetha Ngiba, okhulumela uhlangothi lwaseKuphakameni, uthi baphoxekile ngokubhuntsha kwale nkonzo.
“Udaba njengoba bekuhlelwe ukuba lungene emkhandlwini ngoLwesine, kwenzekile kwafike kwathelelwana amanzi. Kuvunyelwene ngokuthi siqhubeke namalungiselelo enkonzo. NgoLwesihlanu ithimba lethu livukele khona ethempelini liyoqhubeka namalungiselelo. Simangele sekuvumbuka inqwaba yezinsizwa, zithi akukho nkonzo yaqhubeka la, zahlakaza amatshe abesecakiwe ngokumhlophe, zawatshinga le kude,” esho.
UNgiba ukhale ngeNkosi yesizwe uNkosi, athi ibenzele phansi njengoba ethi ifoneliwe, yaziswa ngokuhlasela kwamalungu aseBuhleni, kodwa yangaphuma nezwi eliqodile.
“Ngisola ukuthi isindwe yisisindo salaba baseBuhleni, yagcina ingasaphumeli obala. Lokhu kugcine kwenza inkonzo ithuthele eholo lomphakathi esizweni esiwumakhelwane ngaphansi kweNkosi uKubheka. Laba bantu bebetshela abebandla lethu ukuthi endaweni yaseNewcastle, kukhonya uNyazi kuphela. Singasho ukuthi umcimbi ubhuntshile njengoba ugcine usuthuthela ehholo ngenxa yokuxoshwa endaweni ebihlelelwe wona,” kuphetha uNgiba.
Okhulumela uhlangothi lwaseBuhleni, uMnu Thokozani Mncwabe, uthi badumele ngesenzo sabazalwane babo.
“Ngiyadumala ngalesi senzo sabazalwane, ngisho uNyazi ngeke luyivume le nto. Amakholwa makafunde ukukhonza la ekholwa khona, ayeke izinto ezisemaceleni. Akuyona indlela yokuziphatha eyemukelekile ebandleni,” esho.
INkosi yesizwe uNkosi iqinisekile ukuthi ubekhona umhlangano kodwa uphume nesinqumo sokuthi inkonzo ingabi khona ngoba kuzoxabana abantu.
