AKUCACI ngekusasa lika-Ayanda Borotho emdlalweni iSibongile And The Dlaminis, kulandela ukumenyezelwa njengomunye wabalingisi emdlalweni omusha ozovala isikhala soMkhokha kumabonakude.
ILANGA lishicelele udaba ngomdlalo Ithonga obophele abalingisi abaziwayo kumabonakude okukhona kulona negama lika-Ayanda ongomunye wabalingisi abaqavile kowe-Sibongile And The Dlamini ekhonjiswa kuMzansi Wethu kusukela ngoMsombuluko kuya kuLwesithathu.
Okwenza kungacaci ngekusasa lika-Ayanda kwiSibongile And The Dlaminis wukuthi iqoshelwa eThekwini kanti lo mdlalo omusha azobonakala wona uzoqoshelwa eGoli. ILANGA lizamle ukuthola ngemithombo yalo engaphakathi kwiSibongile And The Dlamini, yaveza ukuthi okwamanje akukacaci ukuthi u-Ayanda uzokwenza kanjani njengoba esezibophezele kulo mdlalo omusha.
“Kungenzeka ancelise amawele nokuyinto ebukeka izobanzima njengoba kuvamise ukuqoshwa nsukuzonke emidlalweni yochungechunge,” kusho umthombo. Omunye osondelene nalo mlingisi uthe vele unengcindezi lo mlingisi yokwehla enyuka njengoba umndeni wakhe useGoli yena esebenzela eThekwini.
“Manje kuphoqa ukuthi masonto onke ashintshe izifundazwe. Ukungena kulo mdlalo omusha, kuzokwenza abuyele emndenini njengoba eshadile futhi enendodakazi angasakwazi ukuchitha isikhathi esanele nayo. Ngokubona kwami uzowushiya eThekwini abuyele eGoli ukuze abe seduze nomndeni wakhe,” kusho omunye umthombo.
Imizamo yokuthola u-Ayanda iphunzile njengoba ebengatholakali ocingweni lwakhe. U-Ayanda uzophinde abonakale emdlalweni okhonjiswa kwiNetflix osihloko sithi Meets The Khumalo’s lapho elingisa khona nabalingisi okubalwa kubo uKhanyi Mbau, Bonga Dlamini, Connie Chiume ongasekho emhlabeni nabanye.
