INHLANGANO yezepolitiki i-MKP ithi umholi wayo uJacob Zuma akumele azichaze ukuthi wayemvakashelelani uClive Derby-Lewis ejele, ongomunye onesandla ekubulaweni kwesishoshovu somzabalazo uChris Hani, owadutshulwa wabulawa ngo-1993.
Lokhu kuvezwe umkhulumeli waleli qembu uMnu Nhlamulo Ndhlela obephawula okokuqala ngemuva kwenkulumo yekhethekile ye-eNCA no-Janusz Waluś okuyilapho uWaluś echaze khona ngokubalala uHani okuyilapho okungene khona neyokuvakasha kuka-Zuma ejele.
Kuyo lenkulumo uWaluś uveze ukuthi akazisoli ngokubulala lo sopolitiki, uma kungavela elinye ithuba angaphinde akwenze.
Uthi imicabango aba nayo ngesikhathi ebulala uHani eyokuthi uphuca izingane zakhe uyise nomyeni kunkosikazi wakhe.
Nakuba eyokuvakasha kuka-Zuma ingaqali ukuvela kodwa ukukhishwa kwayo uWalus kuqubule izinkulumo.
UNdhlela uthi ayikho incazelo ekumele ikhishwe uZuma ngokuvakashela kwakhe uDerby-Lewis.
Ufanisa inkulumo ka-Walus nenhlamba njengoba engakhombisi ukuzisola.
“Uma ungumengameli kunezimfihlo nezifungo ozithathayo, ngakhoi uZuma ngeke achaze lutho uma engasiboni isidingo. Kungenzeka futhi incazelo yakhe iqubule umsindo ongenasidingo. Miningi neminye imihlangano ebanjwe umengameli engadinge kuchazwa,” kusho uNdhlela.
