SIBEKELWE amakhosi amabili isizwe saseMabomvini, eMsinga kubanga umndeni isihlalo sobukhosi. NgoLwesithathu, kungeniswe esibayeni uMnu Mzokhanyayo Ngubane endaweni yakwaMbhono, eMsinga efakwa wolunye uhlangothi lomndeni, kanti ngesonto elandulela lelo, uMnyango wezoKubusa ngokuBambisana neziNdaba zoMdabu KwaZulu-Natal, wamukele uMnu Msawenkosi Ngubane esigodini eNgubevu njengenkosi yesizwe.
UMsawenkosi Ngubane uzalwa iNkosi ekhothame ngonyaka ka-2021, uPano Ngubane kanti uMzokhanyayo yena ungumfowabo kaPano bahlukene ngonina bazalwa iNkosi uMahlokohloko. Ngokuthola kweLANGA, iNkosi uMahlokohloko yayiganwe uMagcumisa, elandelwa uKaMasikane, bese kugcina uMazondi.
Ngokohlangothi oluphikisa ukuqokwa kweNkosi uMsawenkosi ozalwa yinkosi ekhotheme, luthi alenziwanga iqiniso kulolu daba. UMnu Hlelizwe Ngubane, uthi iNkosi ekhotheme (uPano) izalwa unkosikazi omdala uMagcumisa okungafanele azale inkosi kanti uMzokhanyayo uzalwa unkosikazi wesithathu okunguMaZondi okuthiwa walotsholwa isizwe saseMabomvini.
“INkosi ekhotheme (uPano)- yayibambele uMzokhanyayo ozalwa inkosikazi yesithathu ngoba wayesemncane ngaleso sikhathi. Ngakho-ke njengamanje siqondisa ubukhosi ababuyele endlini efanele,” esho.
Uthi kubamangazile ukuphuma kwesinqumo sakwaCogta, ekubeni lolu daba lombango lwaludluliselwe kwikhomishana, besalindele isinqumo sayo.
“Lona obekwe wumnyango, uzokuba yinkosi yomnyango ngoba isizwe saseMabomvini siyalazi iqiniso, ” kusho yena. Uthi lolu daba baludlulisele enkantolo.
Ngakolunye uhlangothi uMnu Leonard Ngubane wohlangothi lweNkosi emukelwe uhulumeni uMsawenkosi Ngubane, uthi sekubangwe kakhulu selokhu kukhothame iNkosi uPano ngonyaka ka-2021. Uveze ukuthi ngoLwesithathu oluzayo kuzobe kunomcimbi omkhulu esigodlweni kwamukelwa isitifiketi senkosi ngomkhuleko. Uthi kumenywe amahlelo amabandla ngokwehlukana kwawo.
“Sisazowenza umcimbi wokungenisa inkosi esibayeni, okwamanje sihlele umkhuleko wokubonga ukuthi udaba luxazululekile,” kusho uNgubane
