KUPHOQE ukuba liguqiswe izolo ngoLwesithathu icala likaNkk Nosiviwe Maphisa-Nqakula (osesithombeni), owayengusomlomo wePhalamende, eNkantolo eNkulu yasePretoria, ekhala ngokugula, wacela ukuyobonana nodokotela.
UNkk Maphisa-Nqakula ubhekene namacala awu-12 enkohlakalo, nokukhwabanisa. Yena uthi umsulwa; ubhecwa ngobubende inyama engayidlanga. Kuthiwa uNkk Maphisa-Nqakula wayefuna ukugwazelwa ngabantu ababenezinkampani ezithola imisebenzi emnyangweni wakhe, ngesikhathi esengungqongqoshe wezokuvikela.
Omunye wabo nguNkk Nombasa Ntshondwa-Ndlovu, osengufakazi wenkantolo, kanti wayesondelene noNkk Maphisa-Nqakula. Wayenezinkampani ezazithola amathenda emnyangweni.
Uthi uNkk Maphisa-Nqakula wayefuna amgwazele ngo-R4,5 million, ngoba kwakukhona ithenda ayithola emnyangweni wakhe, owaba nesandla ukutheni ayithole. Uthi wayesebenzisa amagama “impepho” noma “indumba uma emthumelela imiqhafazo efuna imali yomgwazo.
UNkk Maphisa-Nqakula uvumile ukuthi zikhona izinto ufakazi ayemupha zona, njenge-wig, kodwa akaze amfune imali noma amnike yona. Ebuzwa ngokulungiswa komuzi wakhe oseGauteng, uthe wawulungisa ngemali yakhe, eqashe omakhi abadabuka eZimbabwe, ngoba yibona abawazi kangcono lo msebenzi.
Ummeli wakhe, uMnu Cronje Kriel, ukhale ngokuthi ikilayenti lakhe likhathele, wacela ukuba kuguqiswe ukuthethwa kwecala. UNkk Mapisa-Nqakula ucele ukuyobonana nodokotela ngoba ethi usenenkinga yokuphefumula.
Phakathi kwabantu abebekhona enkantolo, ngumyeni wakhe obeyinxusa, uMnu Charles Nqakula. UNkk Maphisa-Nqakula, wayefuna ukuqulwa kwecala lakhe kungavezwa komabonakude, kodwa inkantolo yamchitha. Uzobuyela enkantolo namuhla ngoLwesine.
