AMAKHATHOLIKA eThekwini namaphethelo, azokhumbula amagalelo nezimfundiso zikaPhapha uFrancis, e-Emmanuel Cathedral, eMakethe, ngo-6 ntambama, ngoLwesithathu.
U-Archbishop Mandla Jwara, ophethe amaKhatholika esiyingini saseThekwini, uthi inkonzo izokuba ngesiZulu nangesiNgisi, njengoba kulindeleke ukuthi umbuthano wokukhumbula uPhapha udonse abantu abaningi abavela ezindaweni ezehlukene, hhayi amaKhatholika kuphela.
“NgeSonto enkonzweni ngizonxusa abazalwane ukuthi bakhulekele ukulondolozwa komphefumulo kaPhapha, njengoba uzobe engcwatshwa ngoMgqibelo. Indlela avalelise ngayo uPhapha isifikisele izinyembezi ngoba usufisele iPhasika elihle, kanti useyavalelisa.
“Sizomkhumbula kakhulu ngezimfundiso zakhe njengoba besimthatha njengenxusa lokuthula emhlabeni, ekuthaza uthando, ukuxolela, ukuphana, nokusizana. Kule minyaka eyi-12, esesikhundleni sokuhola amaKhatholika sizizwe sifudumele, sakujabulela ukuholwa yindoda enjengaye,” kutho uJwara.
Uchaze uPhapha njengomelusi omuhle obe namagalelo abonakalayo. UPhapha uzongcwatshwa ngoMgqibelo, njengoba isidumbu sakhe sizobekwa eSt Peters Basilica Square, kusukela ngoLwesithathu, khona kuzothi bonke abanesifiso sokumbona okokugcina, bambone.
