IQEMBU Umkhonto Wesizwe Party lithole iwadi yalo yokuqala kuMasipala waKwaDukuza, lidla umhlanganiso okhethweni lokuchibiyela kuWard 28 obelubanjwe izolo ngoLwesithathu.
Izolo ebusuku ibisiqalile imibhiyozo kumalungu eMK Party khona KwaDukuza nasezinkundleni zokuxhumana. Kubonakale i-video ekhombisa amalungu aleli qembu ebhiyoza nebhokisi lomngcwabo elibhalwe igama le-ANC.
Le wadi beyiphethwe yi-ANC ngaphambilini, ikhansela layo lesula ngasekuqaleni konyaka.
Ububhekwe ngabomvu umphumela wakule wadi njengoba izimbangi ezinkulu – i-MK Party ne-ANC – zigadle ngezethenjwa zazo ukuyokhankasa kule ndawo ngesonto eledlule.
UMengameli weMK uMnu Jacob Zuma noMnu Senzo Mchunu ongomunye wabasesigungwini esiphezulu se-ANC kuzwelonke ngabanye babaholi abazifikele mathupha ukuyogaya amavoti kule wadi.
