ASETHATHE isinqumo sokuyobhekana ngqo noMbhishobhi omkhulu uMandla Jwara, wamaRoma aKhatholika, amalungu ebandla akhonza ngaphansi kwePherishi iChurch of Immaculate Conception, ePinetown, emuva kokunikwa ikhefu kukaFata wabo ‘ngenxa yobungoma’.
Amalungu ebandla akhonza ngaphansi kukaFata uSifiso Ndlovu, ePinetown, okuvele ukuthi usenikwe ikhefu ngenxa yokuthi ubuye alaphe ngokwesintu, athe azogasela ekoMkhulu lamaRoma eMariannhill namuhla ngoLwesithathu, eyobhekana noMbhishobhi Jwara, okunguyena okhiphe incwadi enika ikhefu uFata Ndlovu, ozogcina ngomhla ka-6 kuMbasa (April) nonyaka.
ILANGA ebelihambele inkonzo yeMisa ePinetown ngeSonto, lifike kugcwele phama, okuthiwe kungenxa yogazi lukaFata Ndlovu kumaRoma akule pherishi, njengoba afika abantu beyimithonseyana eminyakeni eyisihlanu edlule. UFata Ndlovu unikwe ikhefu noFata Thembelani Ngcobo waseMontclair, naye onogazi emakholweni.
Elinye lamalungu ebandla elingeneme ngokumiswa kukaFata Ndlovu, lithe kukhona ilungu elaya kofuna usizo lokwelashwa ngokwesintu kuFata Ndlovu, kanti lizomshutha esebenza, lithumele isithombe kuMbhishobhi Jwara.
“Thina asihlangene nokwelapha ngokwesintu kukaFata Ndlovu. Kunalokho siyakuncoma ngoba kunabantu abaningi abagulayo, abasizayo. Uma ephethe inkonzo, akukho lapho eke akhulume khona ngokwelapha abantu ngokwesintu, kodwa ushumayela ivangeli likaNkulunkulu kuphela.
“Kujwayelekile kwamanye amapherishi ukuthi uFata avuselelwe isikhathi azosihlala epherishi uma sekuphele isikhathi sakhe, kodwa abafuni ukukwenza lokhu kuFata Ndlovu. Inkinga wukuthi uyindoda emele iqiniso, futhi akaphuzi.
“La kwipherishi yasePinetown, kukhona abangabangani bakaMbhishobhi Jwara,” kusho leli lungu.
USihlalo wePherishi yasePinetown, uMdikoni Magasela Mthembu, uthe kuyiqiniso ukuthi amaRoma kaweneme ngokunikwa ikhefu kukaFata Ndlovu.
“Izikhalo zabantu sesizidlulisele kuMbhishobhi Jwara, kuzoba nguyena ozothatha isinqumo ngazo. Thina sinqunywe izandla, kakukho esingakusho ngoba umuntu okunguyena onikwe amandla okuthatha izinqumo, nguyena uMbhishobhi Jwara,” kusho uMdikoni Mthembu.
UMthembu uthe baningi abantu abayizangoma epherishi yabo, kodwa yinto esazoxoxwa ngoba kunomhlangano omkhulu ozayo, okuzodingidwa kuwona indaba yobungoma namaRoma. Eshumayela kwiMisa uFata Ndlovu, akukho akukhulume wakuqonda ngabhekene nakho, kodwa uveze ukuthi kudala edlula ezivunguvungwini.
“Noma ngabe yisiphi isimo obhekana naso, ungalinge uphonse ithawula uNkulunkulu engakasho ukuthi sekuphelile ngawe. Kasikho isimo esingadluli, kumele uhlale emkhulekweni,” kusho uNdlovu.
