UMNYANGO wezeMpilo KwaZulu-Natal usuqinisekise ukuthi uyalwazi udaba lonesi abawu-3 basesibhedlela i-Appelsbosch abathathele isiguli umshwalense. Umnyango uthi uthole isikhalo emndenini wakwaMbatha obusola onesi ngokuthathela indodana yabo engasekho, uNduduzo Mbatha umasingcwabisane ngaphandle kwemvume nolwazi lomndeni.
Umndeni wakwaMbatha ube sewuvula icala emaphoyiseni akwaSAPS, eliphenywa yizinhlaka ezehlukene zezomthetho.
UMnyango wezeMpilo eKZN uthi ngemuva kokuthola isikhalo somndeni, abaphathi besibhedlela babuze onesi ngalesigameko kepha baphika balala ngomhlane. “Bacelwe ukuba babhala izitatimende kepha benqaba. Ngokuphazima kweso bafake izincwadi zokwesula emsebenzini emahoreni awu-24,” kuchaza isitatimende soMnyango wezeMpilo.
Lo mnyango uthi ngenxa yobucayi bodaba selwedluliselwe kwi-Special Investigating Unit (SIU) ukuze luphenywe ngokugcwele, kanti abakwaSAPS bona baphenya icala lokugebenga..
