INHLANGANO elwela amalungelo abantu i-Amnesty International isinxuse uhulumeni ukuthi ubumbe imithetho ezoqondana namacala okubulawa kwabesifazane ngenxa yobulili babo njengoba kwanda ukutholakala kwezidumbu zabesifazane bebulewe eKurhuleni.
Lokhu kuza emva kokuthi ngoLwesihlanu kutholakale isidumbu sesiShiyagalolunye (9) sowesifazane ebulewe.
Isekela likaNgqongqoshe wamaPhoyisa kuZwelonke, uDkt Polly Boshielo lithe bathathu abantu abasemaphoyiseni abasaphekwa ngemibuzo ngalezi zigameko zokubulawa kwabesifazane ezenzeka eKurhuleni.
Namuhla izinhlangano ezehlukene ziyabhikisha ngaphandle kwesiteshi samaphoyisa saseKempton Park ngenhloso yokuthi amaphoyisa alusukumele udaba lokubulawa kwabesifazane okusabalele kule ndawo.
I-Amnesty International ifuna uhulumeni agxile ezigamekweni ezithinta ukubulawa kwabesifazane, uphinde uqinise isandla kwiziphathimandla nokukhipha izinsiza ezanele ukulwa nalama cala.
Umqondisi kule nhlangano, uShenilla Mohamed, uthe ukutshela abesifazane ukuthi bangahambi noma bagijime ngabodwana akukhona ukubavikela lokho.
Uthe umthwalo wokuvikeleka akumele ubekwe emahlombe abesifazane.
Le nhlangano ithe ukulandelela ikhona okubalulekile kunokuthi kucace yonke into ngemininingwane ethinta lezi zigameko. Ukuhlolwa kwezidumbu nakho, ithe le nhlangano kumele kube yinto esheshiswayo ukuthola iqiniso ngokufa kwalaba besifazane bese kuphinde kulethwa izinsiza ezanele kuqiniswe nophiko lweFamily Violence, Child Protection and Sexual Offences.
Ngokocwaningo lwale nhlangano kuvela ukuthi kubulawa abesifazane abangu-15 ngosuku eNingizimu Afrika.
