KUMSHUBELE kwiKhomishini kaMadlanga usomabhizinisi oyamaniswa neqembu lezigebengu, uMnu Vusumuzi ‘Cat’ Matlala enqaba ukuphendula eminye imibuzo ekhala ngokuthi uzolimaza icala njengoba kusamele aphendule enkantolo ngamacala athweswe wona.
UMatlala ubenqaba ukuveza amagama abantu, okuthiwa babekhokhela iPhini loMkhuzi wamaPhoyisa kuZwelonke elimisiwe, uGeneral Shadrack Sibiya.
UKhomishana Sandile Khumalo uthe asizwakali isizathu sikaMatlala sokuthi uzolimaza icala ngokuveza amagama abantu ababekhokhela uGeneral Sibiya. Uthe icala abhekene nalo enkantolo elokuzama ukubulala akaqondi ukuthi lihlangana kuphi nalokhu okumele akuphendulo. Kunalokho uKhomishana Khumalo uthe uMatlala usaba ukugaxelisa abantu okuthiwa babekhokhela uSibiya okuvela negama likasomabhizinisi, uMnu Steve Motsumi kubona.
UMatlala uyena ozisholo ukuthi abantu ababekhokhela uSibiya ngabaseGauteng kodwa ngeke awasho amagama abo. Exinwa ngemibuzo ugcine esethi umuntu owayengumxhumanisi ekukhokhweni kwemali phakathi kukaSibiya nalaba bantu uSergeant Fanie Nkosi.
Lo somabhizinisi uthe indaba yenkokhelo kaSibiya wayeyiveze ngo-April 2025 ehlangene noMkhuzi wamaPhoyisa wakwaZulu-Natal, uLieutenant-General Nhlanhla Mkhwanazi okunguyena amtshela ngemali okusolakala ukuthi yayikhokhelwa uSibiya ngabathile. Ukuhlangana kukaMatlalanoMkhwanazi kuthiwa kwakuhlelwe owayenguNgqongqoshe wamaPhoyisa, uMnu Bheki Cele. Inhloso yawo kwakungukuthi uMkhwanazi angenelele ekuvezeleni uMnyango wezabasebenzi emaphoyiseni ukuthi kungani inkampani kaMatlala iMedicare24 ingenzi kahle. Ekuhlanganeni kwabo kuthiwa akuhambanga kahle njengoba kulapho kwavela khona ukuthi uMatlala unokuxhumana nosomatekisi owayesatshwa uJotham Msibi nokuthiwa wayengumholi weqembu lezigebengu iBig Five Cartel. Kuthiwa babehlanganiswa ukuthi inkampani kaMatlala yonogada yayigada uMsibi. Esagada uMsibi uthe wabona nowayeyinhloko yoKlebe kwaZulu-Natal uMajor General Lesetja Senona evakashele uMsibi epulazini lakhe.
KwiMadlanga uSenona wayethe uMatlala umazi ngokuthi wayengomunye wababemenywe emshadweni wakhe eSoshanguve. Ukufakaza kukaMatlala kuhlehlile.
