AMAPHOYISA aKwaZulu Natal athungatha abasolwa abahlanu abasolwa ngokubulala abane okukhona namaphoyisa amabili kubona esigamekweni esenzeke ethaveni esemgwaqweni Ikhwezi esigcemeni saseBhidla eSundumbili ngoMsombuluko ebusuku.
Kubikwa ukuthi abashonile behlangene kule thaveni bezidlela amanzi amponjwana ngesikhathi kusuka ingxabano kwephoyisa elilodwa nabasolwa abahlanu.
Ngokusho kwamaphoyisa akulesi sifundazwe le ngxabano ixazululekile kwaqhutshekwa nokuphuzwa.
“Ngokuhamba kobusuku kuphinde kwasuka enye ingxabano nabo laba basolwa abahlanu kwasekuba nokudubulana nokuyilapho kudubuleleke iphoyisa,” kusho uColonel Robert Netshiunda okhulumela amaphoyisa esifundazwe.
Ngesikhathi laba basolwa beqhubeka nokudubula kube sekudubuleka nabanye abathathu okuhlanganisa nelinye iphoyisa.
Ngesikhathi efika amaphoyisa endaweni yesigameko afice sebeshonile abane kanti abanye belimele kanzima.
Amaphoyisa athole athole ukuthi le ndawo laba balida abebephuzela kuyona beyingekho emthethweni njengoba ebe eseqoqa bonke utshwala obebukhona kule thaveni.
UNetshiunda uthe imbangela yalesi sigameko beyingakatholakali njengoba enxuse noma ngubani ongaba nolwazi axhumane namaphoyisa aseduzane kule nombolo yocingo 0860010111.
