AMAZULU FC athembisa ukuhlikihla usawoti esilondeni seMamelodi Sundowns esibhibhayo uma la makilabhu esebhekene koweBetway Premiership namuhla ngoLwesibili ngo-19h30 eLoftus Stadium, ePitoli.
USuthu luya kulo mdlalo nje, luhambela phezulu njengoba luyivule kahle imidlalo yeligi lwehlula ngo-1-0 omakoti beligi i-Orbit College ngoMgqibelo KwaMashu. IDowns iyivule kabi njengoba ibambane ngo-1-1 neChippa United eGqeberha.
Ukuvula kweDowns ngale ndlela kufana nokuthi ishaye udaka njengoba ivamise ukuvula ngokudedela isibhaxu imidlalo ilandelana.
UMlondi Mbanjwa odlala esiswini oSuthwini, uthi kayikho enye into abayiyela ePitoli ngaphandle kwamaphuzu amathathu.
“Umdlalo wethu neSundowns ngeke ube lula njengoba belahle amaphuzu emdlalweni wabo odlule. Bazofuna ukuthatha amaphuzu agcwele kithina, kodwa nathi siya kubona sigcwele ukuzethemba ngoba sehlule i-Orbit.
“Siya kulo mdlalo weSundowns ngenhloso yokuqhubeka lapho sigcine khona, siyolanda iwini sibuye namaphuzu amathathu,” esho.
