SAZI MAJOLA MKHWANAZI
UZIMISELE ngokugila izimanga kwiDHL Stomers yaseCape Town uNtuthuko Mchunu (25) ongomunye wabadlali abamqoka kumafolosi eHollywoodbets Sharks yaseThekwini, osesayine inkontileka yesibambiso naleli qembu – okuyilona kuphela eNingizimu Afrika elisanqobe i-United Rugby Championship egijinywa ngawakuleli, awase-Italy, eWales, e-Ireland nawaseScotland.
UNTUTHUKO Mchunu exinwe nguSazi Sandi noRuben van Heerden beStormers azogijima kuyona ngesizini ezayo. ISITHOMBE NGABE: BACKPAGEPIX
IStormers yanqoba le ndebe ngo-2022. UMchunu oyi-loosehead prop (number 1), uyoze ajoyine iqembu lakhe elisha ngokuphela kwale sizini. Uzoyibamba namanye amafolosi okubalwa kuwo u-Evan Roos noDeon Fourie kanti uzobe ebanga indawo no-Ali Vermaak, uSti Sithole noVernon Matongo. Umqeqeshi weStormers, uJohn Dobson, uzwakalise injabulo ngokuthola leli Bhokobhoko.
“UNtuthuko uqale ukudlala umbhoxo okhokhelayo esemncane. Simagange ukubona ukuthi usiphatheleni. Uyingozi uma ephethe ibhola, kanti-ke ukusebenza nabadlali okubalwa kubona uFrans Malherbe noNeethling Fouche – isonto nesonto – kuzomenza akhule kakhulu kunakuqala. Njengoba eneminyaka ewu-25 ubudala, kukhulu asengakwenza kulo mdlalo. Siyajabula ukuthi uqoke ukuzogijima kithina ukukhulisa umdlalo wakhe,” kusho uDobson.
UMchunu uthe usemangake ukuqala impilo entsha eCape Town. “Yithuba elibalulekile leli kimina njengoba ngizosebenza nabadlali nabaqeqeshi bezinga eliphezulu. Uma ubheka iStormers, ibukeka iyikhaya elinemfudumalo uma uyibukela ungaphandle, ngifuna ukuzizwela mathupha leyo mfudumalo sengingaphakathi futhi ngizokwenza konke okusemandleni ukuyilekelela (okwenza kahle) uma sengiyingxenye yayo ngokuphela kwale sizini,” kusho uMchunu esitatimendeni esithunyelwe yiStormers kwabezindaba.
Lo mdlali owayefunda eMaritzburg College – engabuzwa ngokukhiqiza abadlali bombhoxo abasezingeni eliphezulu – uzohamba nesipiliyoni esijiyile asithole koShaka, okuyoba abamkhulisile embhoxweni, lapho ayibambe khona nabadlali bamaBhokobhoko okubalwa kubo uBongi Mbonambi, uTrevor Nyakane, u-Eben Etzebeth, uMakazole Mapimpi, uLukhanyo AM noGrant Williams. Abanye abadlali abadlula eMaritzburg College kubalwa uJoel Stransky owashaya i-drop goal AmaBhokobhoko ehlula iNew Zealand kwiWorld Cup ngo-1995, uButch James owake wayibamba kwiSharks noJesse Kriel weCanon Eagles yaseJapan, owake wayibamba kwiVodacom Bulls kanti ungomunye wabadlali bamaBhokobhoko.
