I-XCEL Running Club iqinise isikwati sayo ngesibabuli somgijimi uKamohelo Mofolo waseLesotho ozokube eyingxenye ye-Absa Run Your City Gqeberha ngeSonto.
Lo msubathi oneminyaka ewu-20 ubudala unethalente elihle kulo mdlalo njengoba enesikhathi esiwu-28:09 kwi-10km.
UMofolo uthi uqale ukugijima ngo-2018 engenamqeqeshi kanti ukwenza kahle kwakhe kulo mdlalo kuthele izithelo ezinhle njengoba eseke wamela izwe lakhe emidlalweni yase-Afrika.
Nyakenye udle umhlanganiso kwi-Absa Run Your City Tshwane ngesikhathi esiwu-28:40, waqopha isikhathi esiwu-28:33 kwi-Absa eThekwini. Ungene isibili kwiTotalsports Two Oceans Half Marathon, wangena unombolo 4 kwiNelson Mandela Bay Half Marathon. Miningi eminye imidlalo enze kahle kuyona.
Ukwenza kahle kwakhe kuchaze umqeqeshi kaTebello Ramakongoana uJames McKirdy wase-United States of America (USA) omfake ngaphansi kwephiko lwakhe. UTebello ubesubathela iXcel ayishiye ekuqaleni kwalo nyaka.
UKamohelo uthi isifiso sakhe esikhulu wukugijima ama-10km namaHalf Marathon phesheya kwezilwandle.
