BHEKI NDLOVANA
AQUBULE ukuqagela amazwi kaMengameli we-EFF uMnu Julius Malema, emuva kokwesula kuka-Adv Dali Mpofu kuleli qembu.
UMpofu umemezele ukuthi usejoyina iMK Party eholwa ngowayengumengameli wezwe uMnu Jacob Zuma.
Emuva kokusabalala kwale ndaba kaMpofu, uMalema ubhale enkundleni yokuxhumana kuX (Twitter) amazwi azwakala sakuthi kunabanye ababili abaquthisile kwi-EFF, abazokwesula, izinhliziyo zabo ezingasekho kuleli qembu. UMalema uqhube waveza ukuthi labo akhuluma ngabo “bacula kahle”.
Abaningi baqale ukuqagula ukuthi kungenzeka ukuba omunye walaba bantu abashiwo nguMalema nguDkt Mbuyiseni Ndlozi. UNdlozi uyaziwa ngokuba yigagu. Uvamile ukucula emibuthanweni yeqembu.
Omunye kwabaphawulile kuX ngalo mbhalo kaMalema nguSithale @SithaleKgaogelo, wathi: “Manje uDokotela Ndlozi ulinde ukubizwa ngegama noma?”.
Nakuba kwabaningi kusheshe kwagqama uNdlozi, kodwa akucaci kahle ukuthi owesibili kungaba ngubani. Abanye basole ukuthi kungenzeka kube nguMnu Carl Niehaus. Kuyaziwa ukuthi ngaphambi kokujoyina i-EFF uNiehaus ubenobudlelwano obuhle noZuma.
Nokho uNiehaus uphuthume waphendula embhalweni kaMalema, wathi: “…mina nje angiyi ndawo”.
