ZIPHASISIWE ePhalamende ngoLwesithathu iziphakamiso ezihambisana nesabelomali sanonyaka esethulwe nguMnu Enoch Godongwana onguNgqongqoshe wezeMali, ngomhla ka-21 ngoMeyi.
Kulezo ziphakamiso ezikulesi sabelomali, kukhona nendaba yokwenyuswa kwentela yemikhiqizo kawoyela njengophethiloli, okuyiyona esuse ukukhuluma. Amanye amaqembu aphikisayo aweneme ngokwenyuswa kwale ntela.
Amalungu angu-268 ephalamende azemukele lezi ziphakamiso zohlaka lokuphathwa nokusetshenziswa kwemali kuhulumeni kanye neziphakamiso zokwandisa imali engenayo kuhulumeni, kwathi angu-88 azichitha.
I-EFF kanye neMKP yiwona maqembu angazemukelanga lezi ziphakamiso zikaGodongwana.
Kuzokhumbuleka ukuthi i-EFF ize yayofaka isicelo eNkantolo eNkulu yaseWestern Cape ifuna kuchithwe indaba yokwenyuswa kwale ntela. Ngeshwa layo i-EFF inkantolo isichithile leso sicelo.
UNkz Omphile Maotwe ukubeke kwacaca ukuthi abavumelani nokwenyuswa kwentela yemikhiqizo kawoyela njengophethiloli, wathi le ntela izokhinyabeza abathengi.
Nakuba i-UDM igcine ivote yazemukela iziphakamiso kodwa uMnu Nqabayomzi Kwankwa oyilungu le-UDM ephalamende wexwayise ngokuthi lokhu kwenyuswa kwentela yemikhiqizo kawoyela kubi okwedlula iVAT okwakukhalwe ngayo kwisabelo esedlule.
Lesi sabelomali ebesidingidwa namhlanje ngesonyaka u-2025/2026, okuvamise ukuba sethulwe ngoNhlolanja (February) kodwa sabhuntsha emuva kokushayisana kwamaqembu ayingxenye kahulumeni wobumbano, ebanga isiphakamiso sokwenyuswa kweVAT. Saphinda sethulwa ngoNdasa (March) kwaqubuka omunye umsindo ngayo indaba ye-VAT, njengoba sigcina sesethulwa okwesithathu.
