AMAQEMBU angaphandle kukahulumeni wenhlanganisela (GNU) eNingizimu Afrika, iMK Party ne-EFF, ashaya amakhala ngosuku lwangomhla ka-4 kuLwezi (November), okumele kuqale ngalo isaphulelo sikaphethiloli nodizili, okumenyezelwe nguNgqongqoshe wezeMali, uMnu Enoch Godongwana, ngesikhathi ethula isabelomali saphakathi nonyaka ngoLwesithathu.
Amaqembu ayingxenye yalo hulumeni wenhlanganisela, isiishayele ihlombe isabelomali sikaGodongwana esihambisane nokumenyezelwa kwesaphulelo sika-R3.50 elitheni kudizili, no-R1.50 elitheni likaphethiloli.
Uthe lesi saphulelo sizoqala ngomhla ka-4 kuLwezi kophezulu, okuwusuku lokuvotelwa kohulumeni basekhaya size sixegiswe ngomhla ka-1 kuZibandlela (Dece- mber) kophezulu.
Ilungu leMK Party ePhalamende, uMnu Kwenza Madlala, uthi akukho okuthembisayo ngale nkulumo kaGodongwana, kunalokho ikhombisa ngokusobala ukuthi uhulumeni usaqhubeka nokufaka abantu baseNingizimu Afrika ehlathini.
Uthi ukumemezela kukangqongqoshe ukuthi isaphulelo sizoqala ngomhla ka-4 kuLwezi, kusayikhona ukudlala ngabantu bakuleli, bebaholela ophathe.
Ngokusho kwakhe, uthi iqiniso lisamile ekutheni isimo somnotho eNingizimu Afrika sisemanzonzo, umnotho usaqhubeka nokukhula ngonyawo lonwabu. Ilungu le-EFF, uMnu Sinawo Tambo, uthi ungqongqoshe usebenzisa amandla akhe ngendlela engalungile, ngoba konke kusemandleni akhe ukufaka isaphulelo, kanjalo nokuvumela ukunyuka kukaphethiloli.
Uthi lokhu kwenza ungqongqoshe akwazi ukudlala ngabantu kalula, njengoba kuza ukhetho, okuzothi uma seludlulile ukhetho, aphinde abuyisele abantu bakuleli ogibeni lokumba eqolo kukaphethiloli. Uthi beyi-EFF kabakuboni ukwephulela abantu ngesaphulelo sezinyanga ezimbili kuzokwenza umehluko, ngoba ngemuva kwalokhu ngoMasingana lapho kuzobe sekunzima kakhulu, umthwalo uzobuyela emahlombe abo.
Amanye amaqembu okubalwa kuwona iDA, i-IFP, i-UDM, i-ACDP ayishayele ihlombe inkulumo kangqongqoshe, ancoma nangokubekwa kwenkece yokulwa nodlame olubhekiswe kwabesifazane nezingane.
UMnu Nhlanhla Radebe we-IFP, uthi okubajabulisayo wukuthi le nkulumo ikwazile ukuthinta ukusetshenziswa kwemali komasipala nokuqashwa kosonhlalakahle abawu-3 500.
UMnu Steve Swart we-ACDP uthe bebengajabula ukuthi lesi saphulelo besizoqhubeka noma izinyanga eziyisithupha.
