INTATHELI YELANGA
AQOPHE umlando amaBhokobhoko esifazane engena okokuqala ngqa kwiQuarter final yeNdebe yoMhlaba selokhu aqala ukugijima le midlalo kusukela ngo-2006. AmaBhokobhoko esifazane ahluleka ancama ngo-2006, 2010, 2014 nango-2021 ukudlulela esigabeni esilandelayo salo mqhudelwano.
NGU-ASEZA Hele wamaBhokobhoko ekakwe yiviyo lase-Italy. ISITHOMBE NGABE: BACKPAGEPIX
Leli qembu laseNingizimu Afrika liwele ngelibanzi lihlula i-Italy ngo-29-24 kowesibili wamaqoqo, okwenze laqhwakela ngamaphuzu awu-10 ku-pool D walo mqhudelwano. Liya kwi-quarter final nje, lisasalelwe wukugijima umdlalo wokugcina wamaqoqo neFrance ngeSonto, ngo-17h45. Kowukuvula libhudluze iBrazil ngo-66-6.
AmaBhokobhoko – abeqala ukushaya i-Italy emidlalweni ewu-4 abasayigijimile – aye ekhefini ehamba phamabili ngo-17-12. Ukube elakuleli kalehlulwanga wukuvalela phakathi conversion amathathu – okuyithuba olinikwa ukukhahlelela ipali emuva kokushaya i-try – belizonqoba ngamaphuzu awu-35, kwazise lithole ama-try awu-5, laqobela phakathi ama-conversion amabili.
