ISIKHULU esiphezulu kwaSuperSportbets, engabaxhasi beKaizer Chiefs ne-Orlando Pirates, sicacisa ngesizathu esenze baxhasa lawa makilabhu ayizingqungqulu ebholeni laseNingizimu Afrika.
IPirates iguqise omkhaya bayo iKaizer Chiefs ngo-2-1 koweBetway Premiership ngoMgqibelo ntambama eFNB Stadium, eSoweto ngamagoli ka-Evidence Makgopa noRelebohile Mofokeng. EleChiefs livalelwe enethini nguGlody Lilepo.
La makilabhu azophinde abhekane kowamanqamu weNedbank Cup ngoMgqibelo ngo-15h30 eMoses Mabhida Stadium, eThekwini.
UGrant Greef oyisikhulu esiphezulu kwaSuperSportbets uthe: “Sinqume ukuxhasa la makilabhu ngoba athandwa kakhulu, okuzokwenyusa izinga lo mkhiqizo wethu nowawo uqobo.
“Ngendlela athandwa ngayo la makilabhu kithina afana ncamishi namaSpringbok, uma uzihlanganisa nawo umkhiqizo wakho uhlale usemehlweni abantu. Abalandeli bahlale ngaso sonke isikhathi bekhuluma ngawo.
Uthe umqhudelwano wabo wozowina indlu uyaqhubeka kuze kube wuNtulikazi (July).
Uwafisele inhlanhla lawa makilabhu koweNedbank Cup. Khonamanjalo, ayaqala manje ngo-10am ukudayiswa amathikithi okuyobuka lo mdlalo.
