ISIYIQAQA eyezinga eliphezulu lobugebengu eNingizimu Afrika, njengoba senyuka isibalo samazwe axwayisa izakhamizi zawo ngokuthi zibe mehlomane uma zikhetha ukuvakashela kuleli. Kamuva nje uhulumeni waseCanada, ulandele ezinyathelweni zeMelika, i-Australia neChina, wexwayisa abantu bawo ukuqikelela ukuphepha kwabo uma bekhetha ukuza eNingizimu Afrika njengoba liphezulu izinga lobugebengu obuhambisana nodlame, ukuthumba, ukubanjwa inkunzi, ukuhlaselwa nokuvukela umbuso imbala (terrorism).
ICanada ithi ubugebengu bakuleli buchaphazela ngisho izivakashi, njengoba kunezigameko lapho zibe yizisulu zokungenelwa ezindlini, ukubanjwa inkunzi, ukudlwengulwa nokubulawa. Lesi sexwayiso saleliya lizwe, sibonakala sithela inhlabathi kwezokuvakasha, ikakhulukazi ezase-malokishini njengoba sithe, yilapho umuntu esengozini khona kakhulu yokuba yisisulu sobugebengu.
NgoNhlangulana (June), iMelika yakhipha isexwayiso esikuLevel 2 ezakhamizini zayo ezifuna ukuvakashela eNingizimu Afrika, ngokuthi kumele zihlale manzonzwane, zisine zijeqeza uma zikuleli.
INingizimu Afrika ngelinye lamazwe athembele kakhulu kwezokuvakasha, njengoba ihamba phambili ngokwezibalo zezivakashi ezansi nezwekazi i-Afrika (SADC). Ngokwezibalo zeStats SA, elakuleli lemukele izivakashi ezilinga-niselwa ku-8.9 million ngonyaka odlule.
