UBOPHA uMnyango wezeMpilo KwaZulu-Natal “ngobudedengu besibhedlela” othi buholele ekushoneni kwendodakazi yawo obekumele ithweswe iziqu ngeledlule, umndeni wakwaMyaka, KwaNongoma.
NgoLwesine olwedlule, ILANGA libike kabanzi ngalolu daba oluvuse usizi ngoLwesithathu, ngesikhathi kuqhubeka umcimbi wokwethweswa kweziqu esikhungweni iDurban University of Technology, impunga yomndeni uMnu Muntukathenjwa Myaka (82) nendodakazi yayo uNkz Sabathile Myaka (40), bemukele iziqu zikaNkz Nokwethemba Myaka, odlule emhlabeni kusele amasonto amabili ethweswe iziqu.
Imibiko iveza ukuthi uNokwethemba, obesewenzile amalungiselelo osuku lokwethweswa kwakhe iziqu, udlule emhlabeni ngasekupheleni kwenyanga edlule ngemuva kwezinkinga ezidaleke ngesikhathi ebeletha esibhedlela iMahatma Gandhi Memorial, eThekwini.
ILANGA likhulume noNkz Myaka, ongubabekazi ka- Nokwethemba ngalolu daba. Uthi ubudedengu obenziwa yizisebenzi zaseMahatma Gandhi baqinisekiswa ngodokotela besibhedlela iVictoria Mxenge, phambilini ebeyaziwa nge- King Edward VIII, okuyibo ababeluleka, babenzela incwadi yokuvula icala.
“Indodakazi kamfowethu yangeniswa esibhedlela iMahatma Gandhi, iyobeletha. Ngesikhathi sekufanele ibelethe ababebhekene nayo kabazange bayilandele imigudu, bavele ba- yibelethisa ngokuyihlinza. Ngemuva kokuyihlinza kabazange bayihlanze ngaphakathi ngendlela efanele, bavele bayithunga. Yaqala yaba nezinkinga, bayihlola khona esibhedlela, bathola ukuthi ishodelwa yigazi. Sebeyifaka igazi, bayifaka elingelona uhlobo lwayo,” esho.
Uthi lokhu kwaholela ekutheni isimo sikaNokwethemba sibe nzima kakhulu, kwaphoqa ukuba bamedlulisele esibhedlela iKing Edward, okuyilapho eyashonela khona.
“Udokotela owayihlola wakuqinisekisa ukuthi ubudedengu benziwe esibhedlela iMahatma Gandhi. Wakuqinisekisa nokuthi ngesikhathi beyifaka igazi bafaka elingahambisani nayo, basitshela nokuthi ngemuva kokubeletha kayizange ihlanzwe, yavele yathungwa nje. Lokhu kwaholela ekutheni abaseKing Edward bayiqaqe umthungo bayihlanze kabusha, ngeshwa-ke umonakalo wabe sewumkhulu, ingane yedlula emhlabeni, ishiya indodakazi yayo eyayibeletha,” esho.
Uthi umndeni ube sewuthatha iseluleko sodokotela base- King Edward, wayovula icala ngobudedengu besibhedlela. Okhulumela amaphoyisa kwaZulu-Natal akatholakalanga ukuphawula, kwaze kwashaya isikhathi sokushicilela.
