AYANDA amaqembu epolitiki afuna uMengameli Cyril Ramaphosa amthathele izinyathelo uMnu Gayton McKenzie, onguNgqongqoshe wezemiDlalo, uBuciko namaSiko, njengoba esolwa ngokucwasa abamnyama.
Lokhu kuza ngemuva kokusabalala ezinkundleni zokuxhumana kwama-post afakwa nguMcKenzie, ongumholi wePatriotic Alliance, eminyakeni edlule, ‘ebiza abantu abamnyama ngamakhafula’. Amanye alawa ma-post kuvela ukuthi wawafaka ngo-2013.
I-Action SA isicebe uMcKenzie kwiHuman Rights Commission, njengoba ithi ukucwasa ngokobuhlanga yinto engafuneki eNingizimu Afrika.
Ne-African Transformation Movement isifake ingcindezi, yanxusa uRamaphosa ukuba athathe izinyathelo ngalo mholi – iqembu lakhe eliyingxenye kahulumeni wobumbano iGNU. Elinye iqembu elifaka ingcindezi yiDA, ethi ukucwasa kumele kulwiwe nakho, kungakhathalekile ukuthi kuqhamuka kubani.
Ukuvela kwalawa ma-post kuze ngemuva kokuba uMcKenzie emangalele i-Open Chats Podcast, eyisola ngenkulumo ecwasa amakhaladi.
