UMMELI wowesilisa obhekene necala lokubulala u-Ayabonga Mjilo, isidumbu sakhe esatholwa sifakwe estamkokweni, ufake isicelo sokuba lichithwe icala ngoba ethi kabukho ubufakazi obukhomba ukuthi ikilayenti lakhe linecala.
Lokhu ummeli ukusho lokhu ngemuva kokuba ummuso usubabize bonke ofakazi bawo emacaleni abhekene noMnu Mfanafuthi Kunene. UKunene ubhekene namacala amathathu okungelokuthumba, elokubulala u-Ayabonga, nelokudukisa ukusebenza kwengalo yomthetho.
Kuzokhumbuleka ukuthi ILANGA selibike izikhawu eziningi ngalolu daba kulandela lesi sigameko esenzeka mhla zingu-24 Nhlangulana wango-2024. Kubikwa ukuthi umufi wayekade egcine ukubonakala noKunene endaweni yobumnandi eMhlanga, kunephathi yokuvala unyaka.
Kuthiwa uKunene wabe esehamba naye umufi, baya kubo eMaoti nokulapho kusolwa ukuthi wafike wambulala khona, maqede isidumbu sakhe wasifaka esitamkokweni. Isidumbu sikamufi saze satholakala emuva kwamasonto amabili enyamalele.
NgoLwesine enkantolo kudlalwe i-video eyaqoshwa yiCCTV ekhombisa imizuzu yokugcina, umufi esaphila. Kule video, umufi uyabonakala efika kule ndawo ngezithuba zabo-22h29 ebusuku. Phakathi kwamabili umufi uphinde ebonakale esephuma noKunene, beya ngasemgaqweni bese beyasithela bonabili, okukholakala ukuthi babeya kogibela i-uber.
USgt Rajen Sanders osebenza ngaphansi kweProvincial Organized Crime Unit, okunguyena owalanda le video kule ndawo yobumnandi, utshele inkantolo ukuthi maningi amakhamera akhona kule ndawo ngaphakathi. Uveze ukuthi ngaphandle kwalena eyabaqopha sebephuma kule ndawo, ayikho enye ekhombisa ngesikhathi sebegibela imoto.
UNkz Rudy Reddy ongummeli kaKunene, ube esefaka isicelo sokuba lichithwe leli cala elibhekene bekilayenti lakhe ngoba ethi abukho umufakazi obubheke nalo. Usho lokhu nje, phambilini waveza ukuthi ikilayenti lakhe enkantolo lizothi alizange limbulale uMjilo, kodwa laphaphama ebusuku esevele esefile ephuma uketshezi oumhlophe emlonyeni.
Uthe ikilayenti lakha labe selithuka lafihla isidumbu ngoba lesaba ukuboshwa.
