INKAKHA yomlingisi esematheni kulezi zinsuku ngephimbo layo kwifilimu yaphesheya kwezilwandle iJumanji, ekhonjiswa ngolimi lwesiZulu esiteshini sikamabonakude iMovie Room, Channel 113, uLindani Nkosi, izifela ngokulingisa emidlalweni yeshashalazi kunekamabonakude.
UNkosi oseke walingisa emidlalweni kamabonakude okubalwa kuyona Isidingo neMy Brother’s Keeper, uphinde abe ngumlingisi osebenzisa kakhulu iphimbo, njengoba ebezwakala nasemidlalweni yezingane iTakalami Sesame. Ekhuluma neLANGA mayelana nokuba ngumlingisi wephimbo (voice-over artist), okuyindlela yokulingisa abantu abangayithatheli phezulu, uthe ukuba ngumlingisi kusho ukusebe-nzisa konke onakho, ukuqinisekisa ukuthi nomuntu ongakwazi ukubona, uyakwazi ukuqonda imizwa yakho ngaleso sikhathi.
Uchaze ukusebenzisa iphimbo lakhe kwifilimu iJumanji njengenye yezinto azithandile, ikakhulukazi njengoba iphimbo lakhe lisebenza endaweni kaDkt Smolder Bravestone, elingiswa nguDwayne Johnson, odume ngelikaThe Rock.
Uthi ukuba khona kwesiteshi iMovie Room, esikwazi ukuthatha imidlalo yaphesheya siyenze ngolwimi lwesiZulu, kusho ukukhula kwalo mkhakha.
“Ukuthatha le midlalo siyenze ngendlela yethu, futhi sisebenzisa ulwimi lwethu, kwenza umbukeli akwazi ukuzizwa esondelene nalo mdlalo,” esho.
UNkosi usebe kulo mkhakha kusukela ngo-1984. Uthe kule minyaka elingisa ngezindlela ezahlukene, ishashalazi yilona elihamba phambili futhi elisenhliziyweni yakhe. Mayelana nokulingisa kumabonakude, uthi Isidingo yisona esamqeqesha kakhulu, wakwazi ukusabalala kulo mkhakha, kodwa ubabaza kakhulu iMy Brother’s Keeper ngokumyisa lapho abengakaze acabange khona.
UNkosi nakuba ewuphila lo mkhakha, kodwa uthi uyakhetha njengoba engavumi ukulingisa noma iyiphi nje indawo.
“Kunezindawo engingahambisani nazo futhi engingeke ngizilingise,” kusho uNkosi, ebala ukuhamba nqunu nokulingisa izindawo ezikhombisa ngokusobala ucansi.
