BETHULELWE isigqoko abafundi baka-matric baseNewcatsle abenze kahle kwimiphumela ka-matric yangonyaka owedlule yize bebebhekene nengwadla yokudlanga kwamaqembu emigulukudu kule ndawo.
Emcimbini obuhlelwe wuMasipala waseNewcastle obuseBlack Rock wokubonga laba bafundi iMeya uMnu Xolani Dube yenze izincomo yaphinde yahalalisela nezikole ezenze kahle kule miphumela.
UDube ulimise ngesihloko elokuthi inkulu inkinga yokudlanga kwamaqembu emigulukudu kule ndawo.
Uthe yize lokhu bekubuye kuklapakele nasezikoleni kodwa bekubanjiswana ebese sinqotshwa isihlava.
“Ngithanda ukunihalalisela kakhulu bafundi baseNewcatsle ngokuyibamba ishisa yize bekukhona le nkinga yamaqembu emigulukudu,” usho kanjena.
Ilungu lePhalamende likazwelonke uMnuz Sethembeni Zondo ophinde abe semkhakheni wezeScience uthe kuyajabulisa ukubona abafundi bakule ndawo benza kahle ku-matric.
Naye ubethulele isigqoko ekutheni bakwazi ukuphumelela phezu kwezinkinga ebezibahlalise lubhojozi.
Nokho uzwakalise ukukhathazeka okukhulu mayelana nesibalo esincane sezikhungo zemfundo ephakeme uma ziqhathaniswa nomthamo wabafundi abaphumelele u-matric.
Kulo mcimbi kuklonyeliswe abafundi abayishumi abenze kahle abavela ezikoleni ezahlukene zakule ndawo.
Bagixatshezwe imishini yoku-printer nama-laptop.
Umfundi obaqwaqwade bonke eNewcatsle walala usithathu KwaZulu Natal uKwandokuhle Mhlungu wasePhendukani Fully Service ushayelwe ihlombe.
Uphiwe ivawusha- yakwa-Takealot yenani lika-R15 000, i-laptop ne-data lika-R2500.
Lo mfundi ugonyuluke ngokuthi bekubakhinyabeza ukuqhubeka kwempi yamaqembu emigulukudu.
“Kwesinye isikhathi bekuze kuphoqe ukuthi abazali bethu basikhaphe noma basilande esikoleni,” esho.
Ubonge kakhulu othisha bakhe. Kunconywe noBonga Sibeko waseZazi High School okunguyena kuphela umfundi waseNewcatsle ohlabane ngo-100% kwi-Science.
Izikole eziyishumi zakule ndawo ezenze zigixatshezwe ngezitifiketi.
