AMAQEMBU uMkhonto weSizwe Party (MK) ne-African Transformation (ATM) asebhalele ngokwehlukana uSomlomo wePhalamende uNkz Thoko Didiza ukuba ahlele usuku lokuba kudingidwe futhi kuvotelwe ukungabethembi ubuholi bukaMengameli Cyril Ramaphosa.
Lokhu kuza ngemuva kokukhishwa kwesinqumo yiNkantolo yoMthethosisekelo ngoLwesihlanu, esithi kwakuphambene nomthetho ukuvota kwamalungu ePhalamende, evotela ukuba engamphenyi uRamaphosa ngodaba lwasePhala Phala, yize ithimba elizimele elaliphenya lolu daba laphakamisa ukuba aphenywe.
Inkantolo inqume ukuthi kuqokwe ithimba ezilophenya ukuthi kumele yini umengameli ekhishwe esikhundleni sakhe (impeachment committee). Udaba lwasePhala Phala lusukela ekwebiweni kwezindodla zamadola aseMelika ezebiwa, okuthiwa zazifihlwe kusofa kuleli pulazi likaRamaphosa.
Lawa maqembu athi afuna uNkz Didiza agunyaze ukuthi uma sekuvotwa ePhalamende, kuvotwe ngokuyimfihlo.
