THANDOLUHLE NGUBO
LIZOQHUBEKA ngoFebruary wonyaka ozayo icala lephoyisa laseLimpopo, uRachel Shokane-Kutimela, elibhekene namacala okubulala ngenhloso yokuzuza imali yomshwalense, emuva kokuthi lilaxaze isicelo sebheyili namuhla. Leli phoyisa liboshwe nendodakazi yalo endala, uNkz Flora Shokane nodadewabo omdala uNkz Anna Shokane, okusolwa ukuthi bamsiza ekubulaleni ezinye zezisulu nasekuzibhaliseni emishwalenseni eyehlukene.
URachel ubanjwe ngenyanga edlule, wathweswa amacala awu-32 okubalwa awu-9 okubulala, awenkohlakalo nawokukhwabanisa. NgoLwesithathu uqale ukufaka isicelo sebheyili eNkantolo yeMantshi yasePolokwane, lapho ebezigibelela khona ebhokisini, achithe amacala abekwe wona. Namuhla ushaye ungqimphothwe ngesikhathi ummeli wakhe etshela inkantolo ukuthi useyasilaxaza lesi sicelo. URachel waboshwa wugalagala lomphenyi wamacala obugebengu bemishwalense, uCpt Kheshi Mabunda, owaduma ngokugojela uRosemary Ndlovu naye owayeyiphoyisa futhi enza amacala afanayo nakaRachel.
