UMENGAMELI Cyril Ramaphosa usedlulise amazwi enduduzo kumaKhatholika emhlabeni wonke ngokudlula komholi wawo uPope Francis.
Lo mholi udlule emhlabeni izolo ngoMsombuluko, endlini yebandla iCasa Santa Marta, eVatican City, ngemuva kokushaywa yi-stroke nokumelwa yinhliziyo. Ubeneminyaka ewu-88.
Esitatimendeni esikhishwe yihhovisi lakhe namuhla ngoLwesibili, uRamaphosa uthe lo mholi ichithe impilo yakhe elwela ukulingana, ukungavalelwa ngaphandle nokuphathwa ngendlela kwabantu ababandlululekile. Uthe uFrancis ubekukhathalela nokunakekelwa kwemvelo.
“UMsombuluko kube wusuku olubi kumaKhatholika namakholwa emhlabeni wonke kudlula umholi obelwela ukuhlanganisa bonke abantu, futhi efuna wonke umuntu aphathwe ngenhlonipho. Ubephethe lesi sikhundla ngentobeko futhi wenze isonto laba yindawo lapho wonke umuntu ezizwa emukelekile,” kusho uRamaphosa.
UPope Francis kubhekwe ukuba abekwe endlini yakhe yokugcina ngoMgqibelo.
