UKHULA ngesivinini umkhankaso wokulwa nokuhlukunyezwa kwabesifazane ofuqwa yiWomen For Change, ngenhloso yokuhlonipha izisulu nokugqugquzela abahlukumezekayo, ukuphumela obala.
Le nhlangano ihlela imashi ezifundazweni ezahlukene eNingizimu Afrika nokubekwa phansi kwamathuluzi ngoLwesihlanu kusukela ngo-12h00 emini kuya ku-13h00, ngenhloso yokuweseka.
Ezinsukwini ezedlule izakhamizi zakuleli bezilokhu zinxenxwa ukushintsha izithombe eziphambili emakhasini azo ezinkundleni zokuxhumana (profile pictures), zifake umbala obukhwebelezane (purple) – ngenhloso yokweseka izisulu zokuhlukunyezwa. Abalo mkhankaso bathi bafuna uhulumeni uyithathele phezulu eyesihlava sokuhlukunyezwa kwezingane nabesifazane.
USiyamthanda “Siya” Kolisi, ongukaputeni wamaBhokobhoko, ungomunye wosaziwayo abahlabe ikhwelo lokweseka lo mkhankaso. Uthi isizwe sikwejwayele ukugqoka umbala oluhlaza ukweseka AmaBhokobhoko, kodwa ngoLwesihlanu, sonke masigqoke umbala o-purple.
“Ngifisa ukunxusa abantu ukweseka lo mkhankaso. Lena yinkinga eseyithathe iminyaka eminingi ikhona. Ungalindi kuze kube ngumuntu wakini noma omaziyo ngaphambi kokuthi kube khona okwenzayo. Sinejoka lokuvikela izingane nabesifazane. Ziningi izinkinga ezikhona ezweni lethu, kepha kasibumbene ngokobulili.
“Ngime nabesifazane kulolu daba. Sekuyisikhathi sokuba amadoda akhulume nawo, kusuka kwabakwezemidlalo, kuya ebantwini emphakathini. Nganakekelwa ngabesifazane ngisemncane, bangikhulisa, bangenza le ndoda engiyiyona namhlanje,” esho ekhasini lakhe lezokuxhumana le-Instagram.
Le mashi ebizwa ngeG20 Women’s March, iqondaniswe nosuku lokuvulwa komhlangano wamazwe awu-20 amakhulu kwe-zomnotho, okuwuLwesihlanu, eGoli. Inhloso wukuthi abaholi abazobe behambele lo mhlangano – ozokuba ngoMgqibelo nangeSonto – babone ingqinamba ebhekene nezwe abalivakashele.
“Ngeke sivume iNingizimu Afrika izibeke njengezwe elinozinzo futhi elinomnotho okhulayo, kube kubulawa abesifazane kulona. IG20 Women’s Shutdown, iwumyalezo oqonde emhlabeni jikelele, wokuthi ngeke ukwazi ukukhuluma ngenqubekela phambili kube kufa abesifazane,” kusho iWomen For Change.
*Ukwesekwa lo mkhankaso nakhu ongakwenza:
– Gqoka umbala o-purple ngoLwesihlanu;
– Hlala ungenzi lutho lapho ozobe ukhona, kungaba yisekhaya, ehhovisi, engadini, esikoleni, e-mall noma epaki ngehora lemashi;
– Ungamasha ngokuthula lapho kuzobe kuhlangenwe khona.
tzondi@ilanga-news.co.za
