BAGIXABEZWE ngodilikajele neminyaka ewu-10, umuntu ngamunye abasolwa abathathu abalahlwe yicala lokunyamalala kwentombazanyana eyayineminyaka ewu-6, uJoshlin Smith.
Laba abathathu okungunina kaJoshlin, uKelly Smith, yisoka lakhe uJacquen Appollis nomngani wesoka lakhe uSteveno Van Rhyn, bagwetshwe yiNkantolo eNkulu yase-Western Cape, ebeyihleli ehholo lomphakathi eSaldanha Bay. Laba bebelahlwe amacala amabili okungelokuthumba nelokushushumbisa abantu kulandela ukunyamalala kuka-Joshlin owanyamalala ngoFebruary wonyaka owedlule.
Likhipha isigwebo ijaji uNathan Erasmus, likhale ngesihluku esenziwe abammangalelwa nokungakhombisi ukuzisola ngisho sekuqhubeka icala enkantolo. Ube eseveza ukuthi amagama alaba azofakwa ohlwini labahlukumeza izingane iChild Protection Register.
