BAGIXATSHEZWE ngesigwebo seminyaka ewu-15, abalisa ababili abalahlwe yicala lokubamba imoto yemali eMtshezi. Isigameko sokubanjwa inkunzi kwemoto yemali senzeka ngomhla ka-8 kaNhlangulana (June) 2022.
USiyabonga Mncube (30) noMbongeleni Manyoni (35), bagwetshwe yiNkantolo yesiFunda e-Estcourt ngoLwesibili. Abasolwa baboshwa ngosuku olulandelayo, batholakala nemali eningi, eyayintshontshiwe.
Okhulumela oKlebe KwaZulu-Natal, uLt Colonel Simphiwe Mhlongo, uthe abasolwa emuva kokuba sebegwetshiwe, inkantolo ibephuce nelungelo lokuphatha izibhamu.
“Isigameko senzeka emgwaqweni u-R103, okuyilapho kwahlaselwa khona imoto ehambisa imali. Ngesikhathi begila lo muga, baqala ngokudubula imoto eyayihamba kulo mgwaqo. Umshayeli wayo wehluleka wukuyilawula, emuva kwalokho bakhomba onogada ngezibhamu, maqede bathatha imali eyayisemotweni. Bobabili babanjwa nemali, bethweswa icala ngesikhathi esisodwa,” kusho uMhlongo.
