BAZOVELA enkantolo maduze abesilisa abayisithupha baseMgababa okuthiwa babanjwe oqotsheni befuna ngodli imali yokuvikela (protection fee) esitolo sendawo ngoLwesine ekuseni.
Ngokwemibiko ekhishwe ngamaphoyisa, laba basolwa bangonogada benkampani ezimele, kanti kuthiwa bebedlube umfaniswano wabo womsebenzi, behlome ngezibhamu, behamba nangemoto yenkampani ngesikhathi bebhadanywa ngamaphoyisa.
Kuthiwa babanjwe ngokubambisana kwamaphoyisa aphenya amacala obugebengu obuhleliwe, awophiko lwezinja kanye nenhlangano eyengamele ukusebenza konogada iPsira. Kuthiwa ngesikhathi beboshwa, batholwe nezibhamu ezinhlanu, izinhlamvu, amafoni ayisikhombisa, nemali ewu-R18 000.
