UKHATHAZEKILE umphakathi waseNkelabantwana, eBulwer, maphakathi neKwaZulu-Natal, ngokunyamalala kwensizwa, eyemuke nomfula uMkhomazi, ngeSonto ekuseni.
Kuthiwa uMnu Siyanda Hadebe (28) wahamba ngezithuba zawo-10 ekuseni ngeSonto, eyozingela, kodwa wemuka namanzi emfuleni uMkhomazi, owawungenisa, udla izindwani.
Ngokusho kwamalungu omphakathi abona isigameko senzeka, azama ukuhlaba umkhosi kodwa kwabanhlanga zimuka nomoya.
“Sazesashayela amaphoyisa ucingo, sicela ukuthi asibizele izinhlambi, zizomtakula kodwa lutho ukufika. Aqala athi indawo amuke kuyo iseduze nekamu lamaphoyisa eMpendle. Amaphoyisa aseMpendle, azihlangula athi indawo emuke kuyona, ingaphansi kweHimeville.
“Izinhlambi zize zafika ebusuku zivela aThekwini, zazama ukumthungatha kodwa zehluleka ngoba kwasekumnyama, futhi nezulu seliqala ukuna. Ngakusasa kwafika amaphoyisa aseHimeville, nethimba labatakuli, kodwa kuze kube namhlanje (ngoLwesine) akakatholakali. Asithembi ukuthi sisayophiinde simthole ephile uSiyanda,” kusho ilungu lomphakatthi elikhathazekile.
UMnu uSandile Phungula, obekhoba kusukela lesi sigameko senzeka, ubekhala ezimathonsi.
“Lo mfana ukhulele kimi, bengihlala kubo esikhathini esingaphambili. Ukumuka kwakhe kusikhathazile njengoba ngize nganikela ngemoto yami. Sihamba namanye amalungu omphakathi ngikhuluma nawe nje, siyambheka,” esho.
Namuhla ngoLwesine, amaphoyisa, abatakuli, nabaholi bomphakathi (amakhansela), bebegudla umfula uMkhomazi, ngenhloso yokuthola isidumbu sikaHadebe.
