UNXUSE ihhovisi likamgcinimafa waKwaZulu-Natal, ukuba liqhubeke nokuqapha ngelokhozi ukusetshenziswa kwemali kweminye yeminyango kahulumeni esifundazweni uNkz Tsakane Maluleke, onguMcwaningimabhuku-jikelele.
UNkz Maluleke usho lokhu ngoLwesine ngesikhathi ekhipha umbiko weminyango kahulumeni nezinhlaka zawo kunyakamali ka-2024/25.
Umcwaningimabhuku ukhombise ukuseseka isinqumo sehhovisi likamgcinimafa esifundazweni, eliholwa nguNgqongqoshe wezeMali uMnu Francois Rodgers, sokungenelela eminyangweni efana nowezemfundo, ayifake ngaphansi kweso elibukhali.
“Iminyango ebhekelele ukuhanjiswa kwezidingo zomphakathi ezibalulekile ezifana nowezemfundo, owezempilo, owokuthutha nowokuhlaliswa kwabantu kumele iqashwe ngeso lokhozi, ihlolwe ngaso sonke isikhathi ukuthi izinto zisahamba ngendlela yini.
“Ngicela umgcinimafa wesifundazwe ukuba aqinise isandla, alawule ukusetshenziswa kwemali ezinhlelweni ezibalulekile zengqalasizinda. Kuyakhathaza ukwanda kweminyango ehlulekayo wukukhokhela osonkontileka ngesikhathi esifanele,” esho.
Uthi phakathi kwezinto ezibambezela ukuhanjiswa kwezidingo zomphakathi, wukwanda kwamacala avulwa ngabasuke behlawulisa iminyango kahulumeni. Uthi le mali seyifinyelele ku-R15 billion, ingxenye yayo eningi iqhamuka emnyangweni wezokuthutha, owezempilo nowezemfundo. Uthi umnyango wezempilo nowezemfundo kawunayo imali ebhekelele izimo ezifana nalezi, okugcina kuphoqa ukuba kusetshenziswe imali yezidingo zomphakathi.
Uthi kunyakamali ophelile, isibalo seminyango ethole ucwaningomabhuku olungahlanzekile senyukele ku-7, eseminyango ebeyithole ucwaningomabhuku oluhlanzekile olungenagcobho sehlele ku-6, sisuka ku-8.
Unxuse ukuba amakomidi abhekelele ukuphathwa kweminyango ePhalamende kanye nelibhekelele ukuphathwa kwemali yomphakathi iStanding Committee on Public Accounts (Scopa) akukhuthalele ukuhlola ukuphathwa kweminyango.
UNdunankulu wesifundazwe uMnu Thami Ntuli uthe bayawemukela lo mbiko. Uthi uhulumeni uzosebenza ngokuzikhandla, ulandele iziphakamiso zikamcwaningimabhuku-jikelele ukuqinisekisa ukuthi yonke iminyango nezinhlaka zayo, bathola imibiko engenagcobho.
