BAKHETHE ukuyilwa nangomkhuleko impi yokudlwengulwa, ukubulawa nokuhlukunyeswa kwabesifazane nezingane, okudla lubi eNingizimu Afrika.
Kule mpelasonto i-IFP Women’s Brigade (IFPWB), esifundeni iSouth Central (eMlazi), ibambe umqhinqo ohambisana nomkhuleko emarobhothini angenela eMlazi, eduze kwaseMega City, amalungu ayo ephethe izingqwebe ezinemiyalezo ephikisana nalesi sihlava.
“Kubalulekile ukuba sisukume sithi, sekwanele ngokudlwengulwa nokubulawa kwabesifazane nezingane. Sikhethe lawa marobhothi ngenhloso yokuba umyalezo wethu ufinyelele kubantu abaningi ngoba lena yindawo ematasa, engenela eMlazi,” kusho uNkk Tholi Mdladla ongusihlalo we-IFPWB eMlazi.
Uthe kumqoka ukuba umyalezo wokulwa nalesi sihlava ufinyelele kuwona wonke umuntu ngoba siyonqotshwa ngokubambisana.
UNkk Ntombifuthi Ntshayintshayi, onguSihlalo we-IFPWB KwaZulu-Natal, ubeyingxenye yalo mkhankaso kanti nguyena futhi owethule inkulumo yosuku emarobhothini.
Lolu phiko lubonge ukubambisana okube khona phakathi kwe-IFP namaphoyisa, okwenze uhlelo lwabo lwaba yimpumelelo. Kulindeleke ukuba kube nomunye umkhuleko eGugu Dlamini Park, eThekwini, ngoLwesihlanu.
