SELUKHISHIWE usuku nendawo okuzodlalwa kuyona umdlalo we-quarter-final yeNedbank Cup ophakathi kweMamelodi Sundowns neSekhukhune United.
Lo mdlalo wawuhlelelwe uMgqibelo womhla ka-08 kuNdasa (March), wahlehliswa ngenxa yokubhukhwa kabili kwenkundla iLucas Moripe Stadium, ePitoli.
Ngalolo suku, inkundla ibinomdlalo wokuhlungela iNdebe yoMhlaba yabeSifazane abaneminyaka engaphansi kuka-17, elakuleli libhekene neNigeria.
I-PSL imemezele ukuthi iDowns neSekhukhune bazodudulana ngoLwesihlanu lo mhla ka-28 kuNdasa (March), ngo-19h00, khona eLucas Moripe.
Ozonqoba kulo mdlalo uzobhekana neKaizer Chiefs kuma-semi-final.
