KUBANJWE umoya ngabafana abasuka ezifundeni ezahlukene ezweni elingumakhelwane wakuleli iSwazini, abangeniswe ezibhedlela kulandela ukulinyazwa kabuhlungu yinkunzi, obekufanele bayibulale ngezandla zabo.
Ngokubika kwephephandaba iSwaziland News, izisulu ezilinganiselwa ngaphezulu kweshumi, zehlelwe yilo mshophi esigodlweni seNgonyama yamaSwazi uMakhosetive “Mswati III” Dlamini eLudzidzini, KwaLobamba. Kuthiwa bekugcinwa omunye wemikhutshana ebalulekile eyenziwayo ngaphambi kokuqala koMkhosi weNcwala.
Lo mkhuba ubizwa ngokuthi “wukubamba inkunzi”. Uyaye wenziwe ngabafana abasuke sebenezinsuku behlala esigodlweni ngenhloso yokugcinwa kwesiko elibizwa ngokuthi “lusekwane”. Usekwane lufaniswa nosiko lokweluka esizweni samaXhosa kuleli.
Kulezi zinsuku izwe laKwaNgwane ligcina leli siko njengoba kunebutho okufanele lidedelwe ngokuphela kwaleli sonto. Leli butho libizwa ngokuthi yiNgatja (ingatsha). Minyaka yonke abasuke bezokwenza leli siko baqanjwa igama elithile, ababizwa ngalo.
Maqondana nesigameko sanamuhla, kubikwa ukuthi iqulu labafana abebesesigodlweni bekufanele bagcine leli siko ngehora lokuqala entathakusa. Ngokusho komthombo weLANGA, akuyona into engajwayelekile ukuthi kube nabesilisa abasala enkundleni uma kwenziwa leli siko.
“Lapha kukhishwa inkunzi ingaboshiwe. Kuyaye kuthiwe abafana mabayibambe, bayibulale. Kube buhlungu okwenzeke namuhla njengoba izingane zabantu, ikakhulukazi abaswele, zilele ezibhedlela, zilwela impilo yazo.
“Izingane zabasondelene nendlunkulu zilele emakhaya, zona kazilubeki eMkhosini weLusekwane,” kusho umthombo.
ILANGA liyibonile i-video eshuthwe esigodlweni yesinye sezisulu okusolakala ukuthi silimale ngesikhathi “kubanjwa inkunzi”.
