Banqunyelwe ugwayi katiki abanikazi bezakhiwo eseziyisizinda samaphara edolobheni elisesiqiwini okuyi-Utrecht ngaseNewcastle njengoba umkhandlu kamasipala wakhona iMadlangeni inqume ukuzifaka endalini ukuze ulungise kabusha idolobha.
Lokhu kumenyezelwe iMeya yaseMadlangeni, uMnuz Lawrence Buthelezi emcimbini wentuthuko ohambisana nokudidiyelwa kwesabelo mali sonyaka ka-2026/2027 sika-R139 million, obusehholo lo mphakathi e-Utrecht ngoLwesithathu.
UButhelezi uthe umasipala ubhekene nenkinga yokuthuthukisa izindawo ezahlukene ngenxa yokuthi kunezakhiwo ezingalungiseki ngenxa yokuthi ngezabantu abazimele nokwenza umasipala ungabi nawo amandla okuzithinta ngakolunye uhlangothi zibe zingcolisa idolobha ngesimo esiyizo.
Uthe uma abanikazi balezi zakhiwo behluleka wukukhokha izikweletu zabo noma ukuxoxisana nomasipala izinsuku eziyisikhombisa, izindawo zabo zizofakwa endalini.
“Kunezindawo ezinye esezigcwele amahlathi nesingakwazi njengomasipala ukuzilungisa. Lezi zindawo uthola ukuthi sekuphele iminyaka eyishumi zingenziwe lutho. Kunalokho seziphenduke imihhume yabaphangi. Zinjalo nje zikweleta umasipala imali yama-rate. Sithe kubanikazi bazo okungcono sibanikeza izinsuku eziyisikhombisa kusuka ngoMsombuluko ukuba bazoxoxisana nomasipala. Uma behlulwa yilokho, sizozifaka endalini ukuze zithengwe ngabantu abazozilungisa ukuze kubuyele ubuhle baleli dolobha, kuphele namaphara,” kusho uButhelezi .
UButhelezi ubuye wamemezela ukuvalwa kokuhlatshwa kwezinkomo emzini yabantu ngemuva kwenqwaba yezikhalo zezakhamizi zasedokobheni i-Utrecht.
Abantu batshelwe ukuthi imithetho yaleli dolobha isiqinisiwe nokuholele ekutheni zingabe zisavunyelwa ukuthi zihlabe izinkomo nezimbuzi emakhaya ngisho kwenzelwa imicimbi yamadlozi.
Lesi senzo siza ngemuva kokuthi amalungu omphakathi esole umasipala ngokuhluleka ukusebenzisa imithetho kamasipala nokuvumela ukwephulwa komthetho e-Utrecht, okubalwa nokuthi abantu bahlabe izinkomo noma kanjani nokuthathwa njengokwephula amalungelo ezilwane.
UButhelezi uthe kumanje indawo yokuhlabela izinkomo izolungiswa ngesamba semali engu-R8 million ukuze izakhamizi ziyise imfuyo yazo khona iyohlatshwa ngokusemthethweni.
“Uzovunyelwa ukuthi wenze amasiko okhokho bakho ngaleyo nkomo noma imbuzi kodwa kumele uyiyise esilaheni uyoyihlabela khona,” kusho uButhelezi.
Wengeze ngokuthi le mithetho kamasipala iphinde ivimbe izakhamizi ukuthi zifuye imfuyo edolobheni ngoba umthetho awuvumi ngenxa yokuthi lisendaweni eyisiqiwi lapho kuvunyelwe izilwane zasendle kuphela.
