ABANEZICUCU zemfundo emikhakheni eyehlukene bazofakwa ezinhlakeni ezithile zamaphoyisa njengoba abakwaSAPS bevule ithuba lokufaka izicelo kusukela ngoLwesithathu kulabo abafisa ukujoyina lo mbutho.
Kuzoqashwa amaphoyisa awu-5500 kulo nyaka nangozayo. Abaneziqu zemikhakha okubalwa kuyo owakwaLaw, iPolicing, iCriminology, iLaw Enforcement, iForensic Investigation ne-Information Technology bazobhekelelwa ezinhlakeni ezikhethekile okubalwa kuzo olwamaHawks, iDetective and Forensic Services neCrime Intelligence. Ukwamukelwa kwezicelo kuyavalwa mhla ka-13 Lwezi (November).
Okhulumela amaphoyisa kuzwelonke uCol Amanda van Wyk uthe badinga intsha yaseNingizimu Afrika eneminyaka engaphansi kwewu-35, ezimisele ngokwenza umehluko emphakathini.
“Uma ngokomzimba unempilo, uqotho futhi uzimisele ngokusebenzela umphakathi nokwakha iNingizimu Afrika ephephile, leli kungaba yithuba lakho,” esho.
Uthe badinga abantu abasha abangakaze baboshwe. Kubhaliswa online ngokusebenzisa iSAPS eRecruitment Portal (https://erecruitment.saps.gov.za).
“Le ndlela yokufaka izicelo yethulwe ngo-2025 yenza kube lula kubantu abasha kuwowonke amazinga empilo ukuba bafake izicelo zokuqeqeshelwa ubuphoyisa. Kumele bafake yonke iminingwane yabo kule nkundla, bazobe sebethola umyalezo kwi-email ezobe iqinisekisa ukuthi iyasebenza yini.”
Uthi bazobe bengabhekile nje kuphela umuntu ozogqoka umfaniswano wakwaSAPS.
“Sibheka umuntu omusha ozoletha ulwazi, ikhono, indlela yokucabanga entsha nokuzimisela ukulwa nobugebengu.
UCol van Wyk uthi uhlelo lokuqoka lunzima, kubhekwa isimo sempilo, impilo yomqondo, kuhlolwe ubuqotho bese kuba ne-interview. Labo abazokhethwa abanezicucu zemfundo ephakeme bazochitha izinyanga eziwu-6 beqeqeshwa, kanti labo abangenazo izicucu bazochitha izinyanga eziwu-9 beqeqeshwa. Bazonikwa imali yokuphila ngesikhathi besaqeqeshwa (stipend) ewu R5000.
“Ukuba yingxenye yeSAPS akusikho ukukhetha umkhakha nje kuphela, kodwa kusho ukukhetha ukulwa nobugebengu, ukuvikela ababuthaka, ukweseka umphakathi nokuba nesandla ekuphepheni kwekusasa labantu baseNingizimu Afrika. Sinxenxa wonke umuntu ukuba afake isicelo kusenesikhathi, bese eqinisekisa ukuthi unazo zonke izidingo ezinqunyiwe.”
